Meron akong bagong kasama sa kwarto ko na galing Pinas. Kadarating lang niya last week at naka assign siya sa shop as Salesman.
Tawagin natin siyang Boy Liit kasi maliit lang eh…..kulang na nga sa height eh manipis pa ang kaha. Maranaw daw siya pero naka tira sila sa Pasig, malapit daw sa palengke.
Nandito ang asawa niya, nurse sa isang Dispensary. Kapag weekend nagpupunta siya dun. Pati biyenan niya dito rin nagtatrabaho, representative naman ng Pag-Ibig Fund. Papatulong nga ako para makakuha ng Pag-ibig sa ibang tsiks….este,….Pag-ibig pala para makapag pundar naman kahit maliit na mansion….LOLs.
Ayun nga, dahil pareho naman kaming pinoy eh, dun ko na pinatuloy sa munti kong kwarto. Kahit masikip at talagang pang isahan lang ang kwarto ko, eh sige kako at dun muna siya. Pero mahirap talagang may kasama sa kwarto na ibang tao, after ilang taon na solo ko yung kwarto, naninibago ako…hindi tuloy kami makapaglaro ni Maria….ahihihihihihi. Hindi bale kung babae yun….LOLs
Dahil sa bago nga siya pinakilala ko dun sa kinukuhanan kong tindahan. Para kung kailangan niya ng supply o pagkain mayrun siyang makukuhanan. Tapos kada sweldo ang bayad. Sinabihan ko siya na dapat huwag siyang papalya sa pagbabayad dahil ako ang malilintikan at sa akin sisingil yon pag nagkataon……
Makalipas ang ilang araw, napapansin ko, kumokonti yata ang supply ko sa ref??? Gaya nung 10 itlog na binili ko…..apat na lang ang natitira eh hindi ko pa ginagamit….alangan namang mapisa yun at maging manok. Sa akin naman eh ok lang. Hindi ko na pinansin dahil baka wala siyang pera…..saka itlog lang naman yun eh….makakabili ulit ako.
Kagabi nagluto ako ng pansit-pansitan na ewan ko kung pansit nga na matatawag yun…LOLs. Pero ok naman ang kinalabasan, para kang kumain sa isang Chinese Resto sa ilalim ng tulay ng LRT….LOLs. Nung dumating siya galing duty, magsasaing pa siya at mag luluto siya ng itlog. Sabi ko nag luto ako ng pansit at kumuha na lang muna siya dun para kahit mamaya na siya magluto at least naka-kain na siya.
Eto matindi….nung pag uwi ko kahapon, bandang 1pm na ako nakauwi galing duty, aba…nilalantakan yung pansit na niluto ako…buti na lang may natira kahit konti. Hindi na ako umimik…….kinain ko na lang yung natira at nagtinapay na lang ako. Ang ginagawa ko kasi, sa gabi ako nagluluto para pag uwi kong lunch, hindi na ako magluluto ng pagkain kasi meron na….eh kaso, nginasab…ayun…natibol yung niluto ko….huwaaahhhh !!!!!
Hindi naman sa nagdadamot ako….….pero siyempre, nagtitipid din ako, para mas malaki ang maipadala ko sa pamilya ko saka isa pa, binibili ko rin yung mga niluluto ko. Magkano din yun? Yung supply na binili ko eh tamang-tama lang sa akin for 1 month. Kasi kada sahod may nakalaan talaga ako for grocery na pang isang buwan. Ok lang sana kung siya ang nagluluto kaso, ako na ang nagluluto iba ang kakain…..asar talo ako dun ah? Hindi ba parang lugi naman ako dun?
Eto pa napapansin ko, yung tubig na nilalagay ko sa ref, gagmitin niya pero hindi naman niya nilalagyan ng tubig pagkatapos niyang gamitin….ohmygulay, naman, yung tubig na iniinom niya eh binibili ko rin….
Paano ko ba maipapaliwanag sa kanya ito na hindi naman siya mao-offend. Nahihiya rin naman kasi akong sitahin, baka naman sabihin niya nagdadamot ako…..paano….paano ko sasabihin??
Walang pinagkaiba sa ikaw na ang inutangan pero ikaw pa ang nahihiyang maningil….parang ganun….






